14 nëntori, Dita Botërore e Diabetit

Asambleja e Përgjithshme e Kombeve të Bashkuara vendosi në vitin 2007 se 14 nëntori do të ishte Dita Botërore e Diabetit. Dokumenti pranoi “nevojën urgjente për të ndjekur përpjekjet shumëpalëshe për të promovuar dhe përmirësuar shëndetin e njeriut dhe për të ofruar akses në trajtim dhe edukim për kujdesin shëndetësor”.

Ritmet e shtimit të rasteve me diabet janë rritur në të gjithë botën. Sipas statistikave të OKB-së, prevalenca globale e diabetit është pothuajse dyfishuar që nga viti 1980, duke u rritur nga 4.7% në 8.5% në popullatën e rritur.

Sot më shumë se 460 milionë të rritur jetojnë me diabet, krahasuar me 108 milionë të tillë, në vitin 1980. Kjo pasqyron një rritje të faktorëve të rrezikut të lidhur si mbipesha ose obeziteti. Gjatë dekadës së fundit, prevalenca e diabetit është rritur më shpejt në vendet me të ardhura të ulëta dhe të mesme sesa në vendet me të ardhura të larta.

Në Shqipëri ka më shumë se 150 mijë diabetikë. 90 përqind janë diabet i tipit 2 që është i moshës adulte, shfaqet kryesisht pas moshës 30-vjeçare. 

Diabeti është shkaku kryesor i verbërisë, mosfunksionimit të veshkave, goditjes në zemër, goditjes në tru dhe amputimit të gjymtyrëve të poshtme. Ushqimi i shëndetshëm, aktiviteti fizik dhe shmangia e përdorimit të duhanit mund të parandalojnë ose vonojnë diabetin e tipit 2. Përveç kësaj, diabeti mund të trajtohet dhe pasojat e tij të shmangen ose të vonohen me mjekim, kontroll të rregullt dhe trajtim për komplikime.

Por ende 100 vjet pas zbulimit të insulinës, miliona njerëz me diabet në mbarë botën nuk mund të kenë qasje në kujdesin që kanë nevojë.