146 vjetori i Lidhjes së Prizrenit, Begaj: Simbol i sakrificës dhe historisë tonë kombëtare

Më 10 qershor 1878 u mbaj Lidhja Shqiptare e Prizrenit, që sot shënon edhe 146 vjetorin e krijimit të saj. Presidenti Bajram Begaj e ka cilësuar këtë hap historik si fillimi e krijimit të vetëdijes kombëtare dhe bashkimit të trojeve tona.

Begaj tha se Lidhja e Prizrenit do të mbetet simboli i sakrificës së shqiptarëve për të mbrojtur vendin dhe identitetin e tyre.

“Lidhja e Prizrenit shënjon një prej ngjarjeve të para të mëdha të krijimit të vetëdijes sonë kombëtare dhe nisjen e lëvizjes për të bashkuar të gjitha trojet e të gjithë shqiptarët. Ajo që ndodhi më 10 qershor 1878, ku patriotë nga çdo krahinë e vilajeteve shqiptare deklaruan në një zë se çdo pëllëmbë tokë nga dheu shqiptar do të mbrohet me gjak, ishte një akt sublim që dëshmon fuqinë e një kombi, shpirtin e një populli për të sakrifikuar gjithçka për lirinë dhe identitetin kombëtar.

Lidhja e Prizrenit do të mbetet përjetë simbol i kësaj qëndrese e sakrifice dhe do të këtë një vend të lartë në historinë tonë kombëtare. Fryma e Lidhjes së Prizrenit shoqëroi kryengritjet para pavarësisë, ajo frymë ishte në Kuvendin e Vlorës dhe po ajo frymë mbajti gjallë shpirtin kombëtar në Kosovë për gati një shekull pushtim serb, derisa solli pavarësinë. Nderim përjetë patriotëve dhe luftëtarëve të Lidhjes  historike të Prizrenit!”, shkruan Begaj.

Lidhja Shqiptare e Prizrenit është një ndër Lidhjet më të organizuara politike gjithëkombëtare pas Lidhjes dhe themelimit të Kuvendit të Lezhës të  2 marsit të vitit 1444, nën organizimin e Gjergj Kastriot Skënderbeut. Delegatët e Lidhjes Shqiptare të Prizrenit kishin fokusin kryesor shmangien me çdo kusht copëtimin e trojeve shqiptare.