42 mijë zgjedhësve nga diaspora iu refuzohet aplikimi, Celibashi kërkon shtyrjen e afatit të regjistrimit

Ndërsa kanë mbetur edhe dy ditë afat për regjistrimin e diasporës në Platformën Elektronike të Regjistrit për zgjedhjet e 11 majit, kreu i KQZ Ilirjan Celibashi duke iu përgjigjur interesit të gazetarëve mbi mundësinë e shtyrjes së këtij afati, si kërkesë kjo e përsëritur edhe nga demokratët, deklaroi se data 9 mars mund të ishte afati i fundit, pasi duhet shpallur lista paraprake.

Celibashi shtoi se shtyrja e afatit të regjistrimit për diasporën me disa ditë, nuk do të bënte diferencë, duke argumentuar se procesi ka nisur që më 11 janar dhe koha për regjistrim ka qenë e mjaftueshme.

“Data 9 mars është një datë që ne nuk shkojmë dot përtej saj sepse është përcaktuar nga ligji. Deri në datën 9 ne mund të flasim dhe të diskutojmë për afate të tjera, pra nuk mund të shkojmë përtej datës 9.  Ka qenë një kërkesë që të shtyhet afati për ditët, për ne s’ka problem, por PS s’ka qenë dakord me këtë ide duke thënë se data 4 është e njohur për të gjithë dhe se është afati i fundit dhe shtyrja për 2 ose 3 ditë nuk do të ndryshonte ndonjë gjë të madhe.

Për pjesën tjetër 3 ditë mund të shërbenin për dikë, do duhet ta pranojmë që kemi filluar më 11 janar dhe ka qenë kohë e mjaftueshme për të pasur mundësi aplikim. Nuk besoj se do zgjidhet problemi për 3 ditë.

Ne do shohim trendin e aplikimeve sot. Deri më sot ka qenë i tillë që numri më i lartë i kërkesave ka qenë të shtunë të dielë, të hënë të martë të mërkurë bie në mënyrë drastike. Nëse do ketë sot sa kishte dje, ja vlen ta konsiderojmë. Për këta 42 mijë, vlente të shtyhej ky afat për opinionin tim”, u shpreh Celibashi, teksa theksoi se 9 marsi është dita kur duhet të fillojë të përgatitet lista paraprake e zgjedhësve.