6 filma shqiptarë të restauruar shfaqen në “Javën e Filmit Shqip”, në Manastir

Për herë të parë organizohet në Manastir, të Maqedonisë së Veriut,  “Java e Filmit Shqip”.

Kjo javë u çel me premierën e filmit “Mësonjtorja” të regjisorit Muharrem Fejzo, film tashmë i restauruar. I gjithë programi i “Javës së Filmit Shqip” përfshin gjithsej 6 filma shqiptarë të restauruar.

Në Kino Manaki të Manastirit ka qenë e pranishme edhe aktorja Roza Anagnosti e cila ka sjellë me rolin e Dafinës personifikimin e patriotes Sevasti Qirjazi, e para grua shqiptare me arsim të lartë, e shkolluar në Manastir dhe Kostandinopojë që hapi të parën shkollë shqipe për vajza në Korçën e vitit 1891 dhe punoi për edukimin dhe ndikimin e grave e vajzave në shoqërinë shqiptare.

Filmi u transmetua me titra në gjuhën maqedonase.

Sot është dita e shfaqjes së filmit “Beni ecën vetë”, prodhim i vitit 1975, me regji të Xhanfise Kekos. Të tjerë filma që do të shfaqen deri në përfundim të këtij eventi, më 25 nëntor, do të jenë: “Përrallë nga e kaluara” (Dhimitër Anagnosti, prodhuar në 1989),  “Zonja nga qyteti” (Piro Milkani, prodhuar në 1976), “Gjeneral Gramafoni” (Viktor Gjika, prodhuar në 1978), dhe  “Shoku ynë Tili” (Fehmi Hoshafi, prodhuar në 1981).

1 nga 8