75-vjetori i NATO-s, Begaj: Pa Aleancën s’do kishte siguri globale

Me rastin e 75-vjetorit të Aleancës së Atlantikut të Veriut, presidenti i vendit Bajram Begaj shprehet se pa NATO-n siguria globale do të ishte e paimagjinueshme.

Në këtë mënyrë, sipas Begajt uniteti dhe vendosmëria e kësaj aleance kanë formësuar një botë më të sigurt.

“Duke shënuar 75 vjetorin e NATO-s, ne jemi të bashkuar në mirënjohje me aleatët tanë.

Uniteti dhe vendosmëria kanë formësuar botën tonë të sigurt.

Pa NATO-n, siguria globale është e paimagjinueshme.

#Ne jemiNATO #Së bashku më të fortë”, shkruan Begaj në një postin në rrjetin ‘X’.

75-vjetori i krijimit të Aleancës më të madhe ushtarake në glob do të shoqërohet sot me ceremoni të ndryshe në selinë qendrore të NATO-s në Bruksel.

Ministrat e Jashtëm të 32 aleatëve të NATO-s do të mblidhen gjithashtu për dy ditë. Ky takim ministrash do të jetë i pari me Suedinë si anëtare me të drejta të plota. Ndërsa vjen saktësisht tre muaj para një samiti vendimtar të NATO-s në Uashington që do të mbahet në muajin korrik.

Në samit, ministrat e Jashtëm do të diskutojnë çështjet më të rëndësishme që kanë aktualisht,  luftën në Ukrainë dhe si ta rrisë NATO-ja mbështetjen për Ukrainën, të ardhmen e Ukrainës pas anëtarësimit të Suedisë në NATO dhe si mund të duket rruga e saj drejt këtij synimi dhe, në fund, kush duhet ta zëvendësojë sekretarin e Përgjithshëm Jens Stoltenberg, i cili do të largohet në fund të këtij viti pas një dekade në krye të aleancës.

Ministrat e Jashtëm nuk pritet të marrin asnjë vendim këtë javë për zgjidhjen e ndonjë prej këtyre sfidave, por disa gjëra duhet të zgjidhen deri në takimin e shefave të tyre në kryeqytetin amerikan nga 9 deri më 11 korrik.

Çështja më e rëndësishme është mbështetja ushtarake për Ukrainën. Mbështetja amerikane për Ukrainën, në vlerë gati 60 miliardë dollarë është bllokuar në Kongres, ndërsa aleatët evropianë të Kievit po bëjnë përpjekje për ta ndihmuar në armatime, sepse ekziston ende frika për një ofensivë ruse në muajt e ardhshëm, e cila mund t’i thyejë vijat mbrojtëse të Ukrainës.