80-vjetori i çlirimit të Aushvicit, Begaj: Krimet e përbindshme, dëshmi se ku çon verbimi pas ideologjive totalitare

Presidenti Bajram Begaj ka përkujtuar 80-vjetorin e çlirimit të Aushvicit, teksa e konsideron Holokaustin si anën më të errët “që rëndon përjetë ndërgjegjen e njerëzimit”.

Në një postim në Facebook, Begaj shkruan se sot përkujtohen krimet e tmerrshme të kryera, si një mënyrë për të mësuar nga e shkuara.

“Krimet e përbindshme të gjenocidit, holokausti ndaj hebrenjve, shfarosja e miliona njerëzve prej mizorisë dhe urrejtjes djallëzore ndaj njerëzve për shkak të besimit apo etnisë janë ana më e errët që rëndon përjetë ndërgjegjen e njerëzimit. Ne përkujtojmë ato krime të tmerrshme në mënyrë që të mbeten në memorien tonë dhe të të gjithë botës si dëshmi e faktit se ku çon degradimi politik dhe verbimi pas ideologjive totalitare”, shkruan Presidenti.

Kreu i Shtetit ka kujtuar edhe rolin e Shqipërisë, teksa shkruan se populli ynë mbrojti dhjetëra hebrenj , duke u bërë shembull për historinë.  

“Populli ynë dëshmoi në kohën e luftës se shpirti i tij mbeti i pastër, mbrojti dhjetëra hebrenj nga persekutimi apo zhdukja, duke u bërë shembull i mrekullueshëm për gjithë historinë tonë. Sot, në Ditën Ndërkombëtare të Holokaustit, lutemi për miliona viktimat e holokaustit dhe lutemi që kurrë më mynxyra të tilla të mos ndodhin”, përfundon Begaj postimin e tij.

Më 27 janar të vitit 1945, Ushtria e Kuqe çliroi Aushvicin, ku gjeti rreth 7000 të mbijetuar nga kampi nazist, përfshirë 700 fëmijë. Ishte fundi i një prej tmerreve më të rënda në historinë njerëzore.

Rreth 50 të mbijetuar do të kthehen sot në Aushvic-Birkenau për të kujtuar ditën kur kampi nazist i vdekjes u çlirua përfundimisht më 27 janar 1945.