85- vjetori i mjeshtrit të madh Renato Radoja , kryebashkiaku Beci, pritje zyrtare për legjenden e basketbollit

85- vjetori i mjeshtrit të madh Renato Radoja , kryebashkiaku Beci, pritje zyrtare për legjenden e basketbollit

Kryetari i Bashkisë Shkodër Benet Beci ka zgjedhur ditën e përvjetorit të 85-të të mjeshtrit të shquar të basketbollit shkodran dhe atij shqiptar, Renato Radoja, për të organizuar një pritje zyrtare në nderim të kësaj figure të spikatur të sportit shqiptar. Së bashku me Radojën në këtë pritje në zyrën e kryetarit të Bashkisë Shkodër, ishin edhe pjesëtarë të familjes Radoja si dhe kolegë të fushës së lojës, nga Shkodra dhe Tirana.

“Një legjendë e gjallë e basketbollit shkodran dhe atij shqiptar.

 Sot pata kënaqësinë ta uroja personalisht Renato Radojën për 85-vjetorin e lindjes. Të gjithë e njohin dhe e vlerësojnë kontributin e çmuar të tij në basketbollin shqiptar. Edhe 100 vite mjeshtër!”, shkruan kreu i Bashkisë Shkodër, Benet Beci në faqen e tij zyrtare.

Ndërkohë, miqtë e tij të sportit, nga Shkodra Tirana, ku Renato kaloi disa vite të suksesshme të sportit,  janë mbledhur për të festuar ditëlindjen e 85-të të legjendës së basketbollit shqiptar, Renato Radoja.

Një emision të zgjeruar për figurën e shquar sportive të Renato Radojës do të keni mundësinë ta ndiqni të premten e ardhshme në emisionin “Histori Sportive” që transmetohet në RTSH Shkodra.