Aksident me të plagosur në Lezhë – Tre automjete, përfshi autobuzin e punonjësve të kampit të Gjadrit, përplasen mes tyre

Një aksident rrugor ndodhi mesditen e së mëkurës në aksin Lezhë-Shkodër, pranë fshatit Balldre.

Tre automjete u përplasën me njëra- tjetrën, mes të cilëve një autobus i punonjësve italianë të kampit të emigrantëve të Gjadrit, një kamionçinë dhe një autoveturë.

Nga aksidenti i cili ndodhi rreth orës 12:00 mbeti i plagosur drejtuesi i autovetures, i cili është dërguar me urgjencë për ndihmë mjekësore në Spitalin Rajonal të Lezhës, nga ku mësohet se ndodhet nën kujdesin e bluzave të bardha jashtë rrezikut për jetën.

Nga të dhënat paraprake, bëhet me dije se kamionçina po levizte në drejtim të Balldrenit, kur është ndeshur ballë për ballë me autoveturën, që po tentonte të parakalonte autobuzin me punonjësit e kampit të Gjadrit, në një segment ku sinjalistika nuk e lejon diçka të tillë.

 Për shkak të përplasjes së fortë kamionçina është rrotulluar në drejtim të kundërt me lëvizjen, duke prekur edhe autobuzin që lëvizte në drejtim të Lezhës, por fatmirërisht drejtuesi dhe pasagjerët nuk morën lëndime.Nga aksidenti u bllokua për rreth 60 minuta lëvizja në superstradën Lezhë-Shkodër,  duke shkaktuar radhë të gjata automjetesh.