Aksidentoi me makinë dy 14- vjeçarë – Policia arreston shtetasin Albert Pali,  për shkelje të rregullave të qarkullimit rrugor

Policia ka arrestuar shtetasin Albert Pali 21-vjeç,  për veprën penale “Shkelja e rregullave të qarkullimit rrugor”. Ai akuzohet se ka përplasur me automjetin që drejtonte dy 14 – vjeçarë, të cilët po udhëtonin me motorçikletë në fshatin Grudë Fushë, në aksin rrugor Shkodër-Hani i Hotit.

 Në vijim të veprimeve për këtë rast, u referuan materialet në Prokurori ku filloi procedimi në gjendje të lirë për veprën penale “Drejtimi i mjetit në mënyrë të parregullt”, për 14-vjeçarin që drejtonte motomjetin, pa leje drejtimi.

Gjithashtu, specialistët e Sektorit të Policisë Rrugore referuan materialet në Prokurori, ku nisi procedimi në gjendje të lirë për veprën penale “Shkelja e rregullave të qarkullimit rrugor”, për një shtetas kosovar,  56 vjeç, dhe për veprën penale “Drejtimi i mjetit në mënyrë të parregullt”, për një 18-vjeçar, pasi ditën e  dielë në fshatin Pentar, automjeti që drejtonte 56-vjeçari është pëplasur me motomjetin që drejtonte një 18- vjeçar. Nga përplasja është dëmtuar 18-vjeçari, i cili është jashtë rrezikut për jetën.

Sektori për Hetimin e Narkotikëve i DVP Shkodër referoi materialet në Prokurori, ku filloi procedimi penal për një 40 vjeçar, banues në Tiranë, pasi gjatë kontrollit fizik, shërbimet e Policisë i gjetën një sasi të vogël lënde të dyshuar narkotike kokainë, e cila u sekuestrua në cilësinë e provës materiale. Materialet procedurale i kaluan Prokurorisë, për veprime të mëtejshme njofton policia.