Aksioni i opozitës, Meta: PL qëndron për rivendosjen e të drejtave kushtetuese të opozitës

Deputetët e Partisë së Lirisë nuk janë përfshirë në aksionin e deputetëve demokratë për të mos lejuar zhvillimin e seancave plenare dhe komisioneve, ndërsa kreu i partisë, Ilir Meta, u shpreh se ata qëndrojnë për rivendosjen e të drejtave kushtetuese, sipas tij të opozitës.

Në një deklaratë për shtyp, ai akuzoi maxhorancën si përgjegjëse për bllokimin e Kuvendit, teksa tha se PL mbështet kërkesat e opozitës.

“Përgjegjës e kësaj krize të bllokimit total të Kuvendit është vetëm drejtimi i telekomanduar nga kryeministri. PL qëndron e vendosur në të gjithë këtë aksion të opozitës për të rivendosur të drejtat kushtetuese të parlamentit dhe opozitës. Në mënyrë të veçantë sa i takon çështjes së Komisioneve Hetimore në parlament, përfaqësimit ët duhur të opozitës në Komisionin e Reformës Zgjedhore dhe sa i takon zhbllokimit në Parlament të gjitha iniciativa të opozitës që prej muajsh bllokohen nga maxhoranca në Kuvend. PL është e vendosur dhe qëndron sëbashku me të gjithë kolegët e tjerë opozitarë”, tha Meta.