Akuzohej për keqpërdorim detyre, dënohet me 3 vite e 8 muaj burg ish-ministri shqiptar
Ish-ministri i Infrastrukturës, Pal Lekaj, është dënuar me 3 vjet e tetë muaj burgim për rastin e ndarjes së 53 milionë eurove shtesë konsorciumit “Bechtel-Enka” për ndërtimin e autostradës “Arbën Xhaferi”.
Aktualisht deputet i Aleancës për Ardhmërinë e Kosovës, Lekaj u dënua për keqpërdorim të detyrës zyrtare dhe dëmtim me dashje të buxhetit të shtetit.
Lekaj është dënuar edhe me dënim plotësues, që ia ndalon për 3 vjet e gjashtë muaj ushtrimin e funksionit publik në administratë publike.
Bashkë me të janë dënuar edhe ish-sekretari i Ministrisë Nebih Shatri me një vit e tetë muaj, drejtori i Prokurimit Besim Tahiri me një vit e tetë muaj burgim dhe këshilltari Eset Berisha me 3 vjet e tre muaj.
Në deklarimet e tyre paraprake të gjithë të akuzuarit ishin deklaruar të pafajshëm.
