Ambasada e SHBA paralajmëron qytetarët: “Let’s Talk Together About US24” s’ka lidhe me ne, skemë mashtruese

Ambasada Amerikane ka paralajmëruar qytetarët lidhur me një projekt të njohur si “Let’s Talk Together About US24”. Në një postim në rrjetet sociale, Ambasada shkruan se ky grup nuk ka lidhje me ta dhe se bëhet fjalë për një skemë mashtruese.

Ambasada bën me dije se po punon me Policinë e Shtetit për të hetuar përmasat e kësaj skeme.

“Ambasada e SHBA është në dijeni të një të ashtuquajturi projekt të njohur si “Let’s Talk Together About US24.” Ky grup nuk ka asnjë lidhje me Ambasadën e SHBA, Departamentin e Shtetit të SHBA, Departamentin e Arsimit të SHBA, programet tona arsimore ose personelin e ambasadës. Shërbimi i Sigurisë Diplomatike i Departamentit të Shtetit të SHBA do të vazhdojë të punojë me Policinë e Shtetit teksa ajo heton përmasat e kësaj skeme mashtruese.

U bëjmë thirrje të gjithë shqiptarëve të jenë të kujdesshëm ndaj mashtrimeve që garantojnë udhëtime falas në Shtetet e Bashkuara, si dhe viza amerikane pa pagesë ose me kosto të ulët. Gjithashtu, i bëjmë thirrje kujtdo që të kontaktojë Ambasadën e SHBA nëse dyshon se ndonjë person ose organizatë përpiqet të paraqesë veten në mënyrë të gënjeshtërt si të lidhur me ambasadën”, shkruhet në postim.