Ambasada e SHBA: Sistem i ri për takimet për të marrë viza joemigruese dhe emigruese duke filluar nga data 30 maj 2025

Ambasada e SHBA në Tiranë do të përdorë një sistem të ri për takimet e vizave duke filluar nga data 30 maj 2025. Lajmi është bërë i ditur nga vetë Ambasada e SHBA-së në Tiranë, nëpërmjet një postimi në faqen e saj zyrtare.

Sipas njoftimit për shtyp, përmes shërbimit të ri, aplikantët për vizë do të mund të marrin informacionin për vizë, të paguajnë tarifat e aplikimit, të planifikojnë dhe të ndryshojnë datat e intervistave dhe të marrin shërbime për dorëzimin e dokumenteve.

“Për të zbatuar këtë sistem të ri, aplikantët për viza nuk do të jenë përkohësisht në gjendje të gjenerojnë fletëpagesa ose të bëjnë ndryshime në orar nga data 19-29 maj. Të gjitha intervistat për viza joemigruese dhe emigruese që janë tashmë të planifikuara ose do të planifikohen përpara datës 19 maj 2025, do të mbeten të vlefshme edhe pas fillimit të sistemit të ri të takimeve për viza. Aplikantët për vizë duhet të planifikojnë të marrin pjesë në takimet e tyre në datat dhe oraret e planifikuara.”, njofton Ambasada e SHBA-së në Tiranë.