Ambasadori i BE-së, Gonzato: Procesi i anëtarësimit s’ka të bëjë vetëm me miratimin e legjislacionit, por edhe me qasje që çojnë në ndryshime shoqërore
Rritja e cilësisë së punës dhe jetës nëpërmjet dialogut social dhe efektiv në Ballkanin Perëndimor, ishte fokusi i një aktiviteti rajonal që solli në Tiranë krerët e Komitetit Evropian Ekonomik dhe Social, Fondacionin Evropian të Trajnimit, Agjencinë Evropiane për Kushtet e Jetesës dhe të Punës dhe përfaqësues nga vendet e Ballkanit Perëndimor.
Diskutimi theksoi rëndësinë e dialogut social në përmirësimin e kushteve të punës, pajisjen e fuqisë punëtore me aftësitë e duhura dhe zgjerimin e mundësive për të rinjtë përmes nismave si ‘Garancia Rinore’.
“Kur vizitoj projektet e financuara nga Bashkimi Evropian në të gjithë Shqipërinë, dëgjoj shqetësimet e të rinjve për pasigurinë në punë, mungesën e arsimit cilësor dhe ndikimin e korrupsionit në karrierën e tyre. Dialogu social, duke përfshirë biznesin, sindikatat dhe OSHC-të, mund të ndihmojë në adresimin e këtyre sfidave. Kjo është arsyeja pse ne mbështesim të rinjtë shqiptarë me iniciativa si Garancia Rinore dhe Plani i Rritjes. Procesi i anëtarësimit nuk ka të bëjë vetëm me miratimin e legjislacionit – ai kërkon një qasje të të gjithëve, i cili duhet të çojë në këto ndryshime shoqërore. Dialogu efektiv social luan një rol jetik në këtë transformim,” tha në këtë takim Ambasadori i BE-së, Silvio Gonzato, sipas një njoftimi për shtyp.
