Amortizimi i urës së re të Bunës – Në një pjesë të urës është hequr sipërfaqja e sipërme e asfaltit
Kjo është gjendja e urës së re të “Bunës” e cila po vijon të dëmtohet .
Në një pjesë të kësaj ure është hequr sipërfaqja e sipërme e asfaltit duke krijuar vështirësi për lëvizjen e automjeteve.
Megjithëse është ndërhyrë disa herë për rehabilitimin e urës, duket se mirëmbajtja e kësaj vepre nuk është në nivelet e duhura për t’i shërbyer qytetarëve.
Këto gropa sjellin njëkohësisht edhe amortizimin e automjeteve që e përshkojnë atë, ku fluksi më i madh regjistrohet në verë, por edhe gjatë festave të fundvitit me rikthimin e emigrantëve në vendlindjen e tyre.
Ura e Bunës ka një rëndësi të madhe, pasi nëpërmjet saj kryhet lidhja tokësore më e shkurtër me Malin e Zi.
Njëkohësisht, nëpërmjet saj bëhet lidhja e dy lagjeve turistike të Shirokës dhe të Zogajve me qytetin e Shkodrës.
