Anija italiane “Cassiopea” me 49 emigrantë në bord mbërrin në Shëngjin

Mbërritja e 49 azilkërkuesve në Portin e Shëngjinit ka rikthyer në zbatim marrëveshjen për emigrantët mes Shqipërisë dhe Italisë.

Anija e marinës italiane “Cassiopea” preku ujërat shqiptare mëngjesin e së martës (28 janar). Tani ata priten të transferohen në qendrat e posaçme, që do të verifikojnë gjendjen e tyre shëndetësore dhe a u lejohet apo jo qëndrimi në vend në bazë të disa kushteve. Personat që pranohen do të transferohen në qendrën e ngritur në Gjadër.

Sipas agjencisë së lajmeve ANSA, emigrantët janë kryesisht me kombësi egjiptiane, nga Bangladeshi, Bregu i Fildishtë, por edhe Gambia. 

Ministria e Brendshme italiane njoftoi në fundjavë se 53 emigrantë të tjerë kanë paraqitur pasaportat e tyre, çka do të përshpejtojë procesin e përpunimit aplikimeve të tyre dhe do të rrisë mundësinë e dëbimit të atyre që nuk kanë të drejtë të qëndrojnë në territorin europian.

Në nëntor të vitit 2023, kryeministri Edi Rama nënshkroi një marrëveshje me homologen italiane për hapjen e  dy qendrave, që do të drejtohen nga Italia, për të strehuar emigrantët që shpëtohen nga autoritetet italiane në ujërat e Mesdheut derisa të procesohen kërkesat e tyre për azil.