Ankimuan vendimin/ Gjykata e Posaçme e Apelit seancë më 20 nëntor

Gjykata e Posaçme e Apelit do të shqyrtojë më 20 nëntor ankimin e personave nën hetim, ish-kryeministrit Sali Berisha dhe dhëndrit të tij, Jamarbër Malltezit. 

Trupi gjykues, sipas shortit përbëhet nga gjyqtarja Iliriana Olldashi, ndërsa seanca do të mbahet në orën 09:00. 

Ish-kryeministri dhe dhëndri i tij, ankimuan vendimin e Gjykatës së Posaçme të Shkallës së Parë, e cila la në fuqi masat e sigurisë ndaj tyre për çështjen e privatizimit të ish-komplektit Partizani, ku ndaj Berishës u vendos masa “Detyrim Paraqitje” dhe bllokim i pasaportës, ndërsa Malltezi u la në burg.

“Gjykata e Posaçme e Apelit për Korrupsionin dhe Krimin e Organizuar, më 14.11.2023, regjistroi çështjen penale nr. 56 akti, datë 14.11.2023 regjistrimi, mbi ankimin e personave nën hetim S.B. dhe J.M., me objekt: “Ankim ndaj vendimit nr. 112, datë 20.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar” që ka disponuar në lëndë të masave të sigurimit personal.

Sipas shortit, trupi gjykues monokratik përbëhet nga gjyqtarja Iliriana Olldashi.

Seanca gjyqësore jopublike është caktuar për më datë 20.11.2023, ora 09:00”, thuhet në njoftim.