Argjentina dhe Senegali në raundin tjetër
fifa
Argjentina dhe Senegali i shtohen listës së skuadrave të kualifikuar për në raundin e dytë të Kampionatit Botëror të moshës deri në 17 vjeç, i cili po zhvillohet në Indonezi dhe që po vjen drejtpërsëdrejti në rrjetin e Radio Televizionit Shqiptar.
Takaoka për momentin shënuesi më i mirë i Kampionatit Botëror, teksa me dygolëshin ndaj Senegalit ka arritur në kuotën e 4 realizimeve në tre ndeshje. I ardhur në pjesën e dytë nga stoli i rezervave, Takaoka ka shënuar fillimisht në të 62’, kurse më pas ka shfrytëzuar gabimin e portierit Mbup në të 72’. Në vërshëllimën e fundit të Obrenoviç, 2-0 për Japoninë, e cila tashmë do të duhet të shpresojë të jetë ndër katër skuadrat më të mira të vendeve të treta për të vazhduar më pas.
Sakaq Argjentina ka mundur 4-0 Poloninë, që, edhe pse ishte gjysmëfinaliste e Kampionatit Europian të moshës deri në 17 vjeç, e mbylli grupin D me zero pikë. Për Argjentinën ka shënuar Laplas në të 34’. Në pjesën e dytë ka realizuar Ruberto në të 46’, Subiabre në të 52’ dhe në fund Lopez në të 86’. Ndeshjet në grupe përfundojnë të shtunën, kurse raundi i dytë nis më 20 nëntor.
