Arrestimi i Çyrbjas, Berisha: Rama të dorëhiqet, autori kryesor i ndërtimit të piramidës shtetërore të krimit
Kryetari i Partisë Demokratike, Sali Berisha ka kërkuar dorëheqjen e kryeministrit Edi Rama, pas arrestimit të ish-deputetit socialist, Jurgis Çyrbja, ndaj të cilit rëndojnë akuza të rënda për lidhje me persona me precedent kriminal, në këmbim të votave. Berisha akuzon Ramën se “është autori i i ndërtimit të pirmaidës më të madhe të krimit në Europë”.
“Sot jam para jush për të kërkuar publikisht dorëheqjen e menjëhershme të kreut të krimit të organizuar shqiptar në pushtet, Edvin Kristaq Ramës, i cili është autor kryesor i ndërtimit me angazhimin e tij direkt të piramidës më të madhe të krimit në Europë, piramidës më të madhe shtetërore të krimit në Europë”, shkruan Berisha.
Sipas kreut të PD-së, të dhënat e publikuara nga hetimet mbi Çybjan implikojnë kreun e qeverisë, teksa shton se ish-deputeti socialist, sipas tij, është i njohur si përfaqësues i klanit mafioz Avdylaj,
“Zonja dhe zotërinj, të dhënat e bëra publike sot nga mediat për ish-deputetin kriminel, Çyrbja, implikojnë direkt kreun e qeverisë së krimit, Edi Rama. Sepse është direkt Edi Rama njeriu që ka ngrënë dardhat e Çyrbjes. Jurgis Çyrbja, i njohur botërisht si përfaqësuesi i klanit mafioz Avdylaj, ka shpërblyer Edi Ramën së bashku me Avdylajn me tonelata dardha të krimbura. Ka dërguar dy herë mandatin e tij në parlament. Rasti Çyrbja është rasti që fakton në mënyrën më të pakundërshtueshme faktin se në Shqipëri vendimmarrës numër 1 është krimi dhe vetëm krimi”, theksoi Berisha.
