Arrestimi i Metës, Kryemadhi: S’kam dijeni për masë sigurie mbi mua dhe as mbi babanë e fëmijëve të mi

Deputetja e Partisë së Lirisë, Monika Kryemadhi ka reaguar pas arrestimit të ish-bashkëshortit të sa, Ilir Meta dhe njoftimeve se ajo është lënë në “detyrim paraqitje”, duke mohuar të ketë dijeni për këto masa sigurie.

Në një postim në Facebook, Kryemadhi shkruan se nuk ka informacione mbi një vendim gjykate që do të  vendose masë sigurie ndaj saj, apo Metës. Ajo e konsideron arrestimin e ish-bashkëshortit të saj si “persekutim nga drejtësia si armë ndaj kundërshtarit politik”.

“Të dashur gazetarë për të cilët kam shumë respekt dhe që sot po raportoni lajme të servirura nga propaganda e qeverisë për sulmet e radhës të drejtësisë ndaj opozitës shqiptare. Unë ende nuk kam marrë dijeni mbi një vendim gjykate që do të vendoste masa sigurie mbi mua apo babain e fëmijëve të mi.

Sapo të njoftohem për këto vendime të drejtësisë do të përgjigjem me të gjitha hapat ligjore dhe publike. Persekutimi nga drejtësia si armë ndaj kundërshtarit politik, si dhe gjyqi publik që po na bëhet, nuk ndalon opozitën në betejat pa kompromis për të mbrojtur interesin publik. Duke nisur nga Inceneratorët dhe der tek çdo betejë tjetër të drejtë që po luftojmë për shqiptarët”, shkruan Kryemadhi.