Arrihet marrëveshja Izrael Hamas për armëpushim 4-ditor dhe lirimin e 50 pengjeve në Gaza

Izraeli dhe Hamasi kanë rënë dakord për një armëpushim katër-ditor dhe lirimin e 50 pengjeve të mbajtur në Gaza.

Njoftimi u dha nga qeveria izraelite e cila bëri me dije se marrëveshja përfshin lirimin e 50 pengjeve, të gjithë gra dhe fëmijë, për katër ditë, gjatë të cilave do të ketë pauzë në luftime.

Grupe prej 12-13 pengjesh do të lirohen në ditë.

“Qeveria e Izraelit është e detyruar të kthejë në shtëpi të gjithë pengjet. Qeveria sonte ka miratuar skemën e fazës së parë të arritjes së këtij qëllimi, sipas të cilit të paktën 50 pengje – gra dhe fëmijë – do të lirohen gjatë katër ditëve, gjatë të cilave do të bëhet pauzë në luftime. Lirimi i çdo dhjetë pengjesh shtesë do të rezultojë në një ditë shtesë në pauzë.

Qeveria e Izraelit, IDF dhe shërbimet e sigurisë do të vazhdojnë luftën për të kthyer në shtëpi të gjithë pengjet, për të përfunduar eliminimin e Hamasit dhe për të siguruar që nuk do të ketë asnjë kërcënim të ri për Shtetin e Izraelit nga Gaza”, thuhet në njoftimin e qeverisë izraelite, raporton BBC.

Biden: E rëndësishme që të zbatohen të gjitha aspektet e marrëveshjes

Marrëveshja u përshëndet edhe nga presidenti amerikan Xho Bajden (Joe Biden), i cili u shpreh “jashtëzakonisht i kënaqur” që disa nga pengjet që kanë duruar “javë robërie dhe një sprovë të papërshkrueshme” do të ribashkohen me familjet e tyre sapo të zbatohet marrëveshja.

Presidenti amerikan falënderon liderët e Katarit dhe Egjiptit për “udhëheqjen dhe partneritetin e tyre kritik” në arritjen e marrëveshjes.

Dhe ai thotë se vlerëson “angazhimin” e kryeministrit izraelit Benjamin Netanyahu për të mbështetur një pauzë në luftime.

“Është e rëndësishme që të gjitha aspektet e kësaj marrëveshje të zbatohen plotësisht”, thekson ai.

Marrëveshja, Blinken: Ndihma shtesë humanitare në Gaza

Sekretari amerikan i Shtetit, Antony Blinken ka përshëndetur gjithashtu arritjen e marrëveshjes, teksa ka falënderuar Katarin dhe Egjiptin për partneritetin e tyre,

Blinken u shpreh se arritja e kësaj marrëveshje do të lejojë ndihma shtesë humanitare për palestinët në Gaza.

“Ne mirëpresim lirimin e 50 pengjeve, duke përfshirë amerikanë, nga robëria në Gaza. Falenderoj Katarin dhe Egjiptin për partneritetin e tyre dhe vlerësoj mbështetjen e Izraelit për një pauzë humanitare që do të lejojë ndihma shtesë humanitare të arrijë tek palestinezët në Gaza”, shkruan Blinken në X.