Ashpërsimi i kodit penal/ Sindikata e Policisë pro iniciativës, efektivët blu përfaqësojnë shtetin

Paralajmërimi i ministrit të Brendshëm Taulant Balla për mundësinë e ashpërsimit të Kodit Penal, me qëllim parandalimin e sulmeve ndaj efektivëve blu gjatë ushtrimit të detyrës apo për shkak të detyrës, mbështeten nga Sindikata e punonjësve të Policisë.

Sadetin Fishta, kreu i kësaj sindikate, thotë në një intervistë për RTSH, se prioritet është jeta e efektivëve blu.

Për këtë sindikatë, ndryshimet duhet të synojnë çdo veprim të qytetarëve ndaj efektivëve të çdo grade apo sektori qoftë.

Organizata e Policisë së Shtetit ka numrin më të lartë të Dëshmorëve të Atdheut, të cilët kanë rënë në krye të detyrës apo për shkak të detyrës.

Mosbindja ndaj urdhrave të ligjshme të punonjësit të policisë nga kundravajtje penale, mund të dënohet me burgim deri në tre muaj.

Kundërshtimi i punonjësit të policisë, me qëllim për ta penguar atë që të kryejë detyrën, nga dënimi me një vit burg, kur kryhet në bashkëpunim ose duke ushtruar dhunë fizike ose më shumë se një herë, mund të dënohet me burgim gjer në shtatë vjet.

Goditja me duar e punonjësit të Policisë për shkak të detyrës, aktualisht është dënim deri në pesë vjet burg, por ky dënim mund të rritet.

Policia e Shtetit numëron 226 Dëshmorë të Atdheut.