Atentat i dështuar me armë – 32-vjeçari bën kallëzim në policinë e Shkodrës
Policia e Shkodrës ka nisur hetimet pas denoncimit të një 32-vjeçari se i kishin drejtuar armën dy persona që lëviznin me motor.
Sipas policisë, më datë 11.10.2024, në orën 09:30, shtetasi me inicialet A. B., 32 vjeç, ka kallëzuar se mbrëmjen e së enjtes, rreth orës 22:30, persona të paidentifikuar që qarkullonin me një motomjet, i kanë drejtuar një send, në dukje armë zjarri, afër një lokali në pedonalen e Shkodrës.
Shërbimet e Policisë dhe grupi hetimor kanë shkuar në vendngjarje dhe kanë kryer veprimet e para hetimore.
Nga veprimet paraprake të kryera dhe informacionet e marra në rrugë operative, paraprakisht dyshohet për dy shtetas, por për arsye hetimore nuk bëjmë me dije të dhëna.
Grupi hetimor, në drejtimin e Prokurorisë, vijon punën për sqarimin e rrethanave, zbardhjen dhe dokumentimin ligjor të rastit.
