Atletika, dy rekorde të reja olimpike

Dita e pestë e garave të atletikës në Lojërat Olimpike “Paris 2024” kanë dhuruar dy rekorde të reja olimpike. E kjo fillimisht në 1500 metra për meshkuj, atje ku amerikani Hoker ka fiksuar kohën e re olimpike 3’27:65, si dhe në 3000 metra me pengesa për femra, ndërsa Javi e Bahreinit ka dhënë kohën 8’52”76. Një medalje e artë për atleten nga Bahreini e marrë në metrat e fundit duke lënë nga pas Çemutain e Ugandës dhe Kerotish të Kenias.

 Ndërkohë një garë e luftuar kërcimi së gjati për meshkuj, ndërsa greku Tentoglu ka marrë medaljen e artë me rezultatin 8.48 metra, teksa ka lënë nga pas Pinok të Xhamajkës me 8.36 metra dhe Furlanin e Italisë me 8.34 metra. Një e artë ka shkuar për Kanadanë në hedhjen e çekiçit për femra, ndërsa vendi i parë ka shkuar për Roxhers, që ka fiksuar rezultain 76.97 metra.

Garë spektakolare 200 metra, e cila në metrat e fundit është fituar nga amerikania Tomas me kohën 21”82 duke i dhënë fund kështu mbrëmjes të së martës, ndërsa dhe atletika po i drejtohet fundit të garave në Lojërat Olimpike “Paris 2024”.  Në atletikë kryesojnë Shtetet e Bashkuara të Amerikës me katër medalje të arta, pesë të argjendta dhe pesë të bronzta.