Autizmi dhe përmasat e tij: në Shqipëri figurojnë 2.467 persona. CDC: Preket 1 në 36 persona
Autizmi vijon të mbetet një nga diagnozat më të vështira për tu menaxhuar nga të gjitha popullatat dhe me enigmatikja për sa i përket shkaqeve. Autizmi është një çrregullim neurobiologjik i zhvillimit të trurit me shumë të panjohura dhe që mund të prekë këdo. Sipas agjencisë amerikane të shëndetit publik, CDC, ky çrregullim prek 1 në 36 fëmijë.
Në Shqipëri sipas të dhënave që Ministria e Shëndetësisë i ofroi në rrugë zyrtare RTSH-së, 2,467 persona me çrregullime të spektrit të autizimit trajtohen me pagesë të aftësisë se kufizuar nga programi i mbrojtjes sociale dhe 1,450 prej tyre mbështeten dhe me pagesë për shërbimin e ndihmësit personal. Fëmijët me çrregullime të spektrit të autizmit përfitojnë në total nga 76 shërbime publike (ditore dhe rezidenciale) në të gjithë vendin.
Fëmijët me çrregullim të spektrit kanë të dëmtuara disa funksione, por tri janë më të rëndësishmet:
- Dëmtime në marrëdhëniet sociale apo dëmtime të ndërveprimit shoqëror, të cilat mund të konsiderohen si çrregullime kryesore, pasi kanë të bëjnë me aftësitë e integrimit në shoqëri.
- Dëmtime në komunikim, të cilat prekin tërësisht ose pjesërisht të folurit.
- Dëmtime në mënyrën e sjelljes, që shprehen me lëvizje kaotike të duarve, kokës apo trupit, lëvizje të përsëritura, stereotipike, të lodhshme, jo rrallë edhe të kufizuara
Shkencëtarët ende nuk e dinë shkakun e saktë të autizmit. Çrregullimi, i cili zakonisht diagnostikohet në fëmijërinë e hershme, mendohet të ndodhë për shkak të një kombinimi të faktorëve gjenetikë dhe mjedisorë.
