Bajden dënon përdhunimin e grave dhe vajzave izraelite nga militantët e Hamasit

Presidenti i SHBA Xho Bajden (Joe Biden) ka denoncuar përdhunimin dhe dhunën seksuale të raportuar të kryer ndaj vajzave dhe grave izraelite nga militantët e Hamasit gjatë sulmit të 7 tetorit në Izrael , duke i bërë thirrje botës që të dënojë një sjellje të tillë “pa ekuivok” dhe “pa përjashtim”.

Duke folur në një mbledhje fondesh për fushatën në Boston, Bajden vuri në dukje se javët e fundit, femrat e mbijetuara dhe dëshmitaret e sulmeve kanë ndarë “rrëfime të tmerrshme të mizorisë së paimagjinueshme”.

“Raportet e grave të përdhunuara – të përdhunuara në mënyrë të përsëritur – dhe trupat e tyre të gjymtuar derisa ishin ende gjallë – të kufomave të grave që përdhoseshin, terroristët e Hamasit që u shkaktuan sa më shumë dhimbje dhe vuajtje grave dhe vajzave dhe më pas i vranë ato. Është e tmerrshme”, tha Bajden.

Izraeli ka thënë se po heton disa raste të sulmeve seksuale dhe përdhunimeve nga sulmi i Hamasit ndaj Izraelit. Dëshmitarët dhe ekspertët mjekësorë kanë thënë se militantët e Hamasit kryen një sërë përdhunimesh dhe sulmesh të tjera përpara se të vrisnin viktimat në sulmin e 7 tetorit, megjithëse shtrirja e dhunës seksuale mbetet e panjohur.

Kombet e Bashkuara mbajtën një takim të hënën në të cilin dëgjuan rrëfime për dhunën seksuale të dyshuar të kryer nga Hamasi , dhe në të cilin folësit sulmuan gjithashtu aktivistët e të drejtave të grave dhe zyrtarët e OKB-së që nuk bënë më shumë për të hetuar apo dënuar këto krime.