Bajden: Vështirë të arrihet një armëpushim midis Izraelit dhe Hamasit para Ramazanit

Presidenti amerikan Xho Bajden (Joe Biden) tha se një armëpushim midis Izraelit dhe Hamasit para fillimit të Ramazanit duket i vështirë.

“Duket e vështirë,” i tha Biden një gazetari kur u pyet nëse një marrëveshje armëpushimi në Rripin e Gazës ishte e mundshme përpara fillimit të muajit të shenjtë mysliman të Ramazanit.

Presidenti amerikan nuk e fshehu shqetësimin e tij për një përshkallëzim të dhunës në Jerusalemin Lindor nëse operacionet ushtarake izraelite vazhdojnë gjatë Ramazanit.

Nga ana tjetër, Hamasi u bëri thirrje palestinezëve që të “mobilizohen” dhe “të dynden” gjatë Ramazanit në xhaminë Al-Aksa të Jerusalemit, pasi ekziston frika e tensioneve gjatë kësaj periudhe, pas pesë muajve të luftës në Gaza midis Izraelit dhe lëvizjes islamike palestineze.

Në të njëjtën kohë, Hamasi deklaroi se nuk do të bëjë “asnjë kompromis” në kërkesat e tij për një armëpushim përfundimtar dhe tërheqjen e forcave izraelite nga Rripi i Gazës, në mënyrë që të bien dakord për lirimin e pengjeve që mban pas tetorit.