Balla takon Ndihmës Sekretarin amerikan të Shtetit: Lufta kundër trafikut të qenieve njerëzore, prioritet

Ministri i Brendshëm Taulant Balla është takuar me Ndihmës Sekretarin amerikan të Shtetit Todd D.Robinson.

Në fokus të këtij takimi, ishte rritja e bashkëpunimit mes dy vendeve për luftën kundër krimit të organizuar dhe trafikut të lëndëve narkotike.

Balla bëri me dije se gjithashtu do të intensifikohen përpjekjet për përmirësimin e rezultateve në luftën kundër trafikimit të qenieve njerëzore në kuadër të Mekanizmit Kombëtar të Referimit.

“Në takimin me Ndihmës Sekretarin e Shtetit Todd D. Robinson biseduam mbi bashkëpunimin e shkëlqyer me agjencitë ligjzbatuese dhe programet e asistencës amerikane si DEA, INL dhe ICITAP. Mirëpresim mbështetjen amerikane edhe në forcimin e kapaciteteve dhe shkëmbimin e eksperiencave mes Akademisë së Sigurisë dhe shkollave të policisë në SHBA. Lufta kundër krimit të organizuar, prodhimit dhe trafikimit të lëndëve narkotike janë një prioritet kryesor, ndërsa goditjet e forta kundër grupeve kriminale vijojnë të intensifikohen çdo ditë, falë hetimeve komplekse në bashkëpunim me SPAK dhe prokuroritë e juridiksionit të përgjithshëm. Do të intensifikojmë edhe më shumë përpjekjet për përmirësimin e rezultateve në luftën kundër trafikimit të qenieve njerëzore në kuadër të Mekanizmit Kombëtar të Referimit. Bashkë me SHBA jemi pjesë e Koalicionit Global ndaj kërcënimit të Drogave Sintetike, për të koordinuar masa konkrete kundër prodhimit, trafikimit dhe shitjes së tyre tek të rinjtë dhe përdorues të tjerë”, shkruan Balla në rrjetin social Facebook.