Ballkani, Ilir Daja flet në prag të përballjes me Dinamon e Zagrebit

Humbja ndaj Viktoria Plzen në ndeshjen e parë të grupeve të Conference League, duhet të harrohet shpejt te skuadra e Ballkanit. Ditën e enjte, duke filluar nga ora 18:45, në stadiumin Fadil Vokrri, kampionët e Kosovës do të luajnë ndaj Dinamos së Zagrebit. Një përballje e vështirë duke parë emrin që ka kundërshtari. Trajneri Ilir Daja në konferencën për shtyp foli për nivelin e kundërshtarit dhe vështirësinë e kësaj përballjeje. “Sigurisht që të gjithë e dimë se çfarë ekipi me vlera do të kemi përballë. Mendoj se duhet që të japim maksimumin tonë që të paraqitemi në nivelin që kërkon konteksti ku do do të luajmë”, tha Daja.

Trajneri Ilir Daja foli gjithashtu për gjendjen e skuadrës, dhe shanset që ekipi i tij të kalojë grupin me kundërshtarë si Astana, Dinamo Zagreb dhe Viktoria Plzen. “Ne do të bëjmë maksimumin për të ecur sa më shumë në këtë kompeticion. Ekseprienca bën diferencën në të tilla kompeticione dhe për këtë motiv them se disa skuadra janë më të favorizuara se të tjerat. Por në përfundim dua të nënvizoj se do të bëjmë maksimumin tonë për të gëzuar tifozët”, theksoi tekniku i Ballkanit.