Banesa e Ramiz Bekteshit, ndër atraksionet turistike të Shkodrës
Banesa shkodrane e familjes “Ramiz Bekteshi” është Monument Kulture, Kategoria I, e shpallur në vitin 1977, nga Ministria e Arsimit dhe Kulturës për vlerat arkitekturore dhe dekorativo-artistike.
Banesa shkodrane 150-vjeçare me kompozim horizontal, e vendosur në një truall të gjerë, është e shkëputur nga rruga nga e cila ndahet me mure të lartë. Bëhet fjalë për një ndërtim dykatësh prej guri, e tipit me çardak, ku përfshin odën e miqve dhe hajatin.
DRTK Shkodër në vijim të punëve për ruajtjen e trashëgimisë kulturore po punon me këtë banesë veçanërisht duke riparuar e përforcuar suvatimin, po restauron murin e gurit si dhe po suvaton fasadat anësore.
Në këtë banesë, oda e miqve është përfaqësuese e tipologjisë së fundit të shekullit XVIII dhe fillimit të shekullit XIX, ku vlerësohet mjeshtëria e daltimeve në dru në shumë elementë si tavani, dera e gdhendur, sergjeni, volumi trapazan-musander, dritaret, dollapet e murit dhe oxhaku dekorativ, punuar në allçi i plazmuar në vend.
Banesa mban emrin e tregtarit Ramiz Bekteshi, i cili kishte në pronësinë e tij toka në të gjithë zonën e Nën Shkodrës dhe në pazar.
