Bardhi i përgjigjet Bashës: Leksione boshe nga një deputet që ka 5 muaj që vjen vërdall si memec

Kreu i Grupit Parlamentar të PD-së, Gazment Bardhi ka reaguar pas deklaratave të Lulzim Bashës, i cili doli në një konferencë për shtyp këtë të enjte (11 janar).

Në një postim në X (dikur Twitter), Bardhi ka reaguar me tone të ashpra teksa akuzon Bashën si përgjegjësin kryesor për faktin që PD është ende në opozitë. Teksa i referohet si “deputeti opozitar”, Bardhi shkruan se Basha ka që prej 21 marsit të vitit 2022 që nuk shkon në Kuvend dhe se nuk ka bërë asnjë reagim mbi situatën politike në vend.

“Të të bëjë manual sesi bëhet opozita përgjegjësi kyç që e la partinë 12 vjet në opozitë, që shpalli sot të vdekur 60 mijë anëtarë të partisë vetëm se shprehin kundërshtin për të kaluar nga dështimi në dështim, deputeti opozitar që ka nga 21 Mars 2022 që nuk vjen në Kuvend, që s’ka bërë asnjë kallëzim në prokurori kundër Qeverisë dhe asnjë denoncim ndaj Qeverisë, që ka 5 muaj që vjen vërdall si memec pa thënë asgjë mbi realitetin politik, edhe pse vendi po rrëshket në autoritarizëm, është për të qeshur dhe për të qarë njëkohësisht”, shkruan Bardhi.

Sipas tij, opozita është në betejë me kryeministrin Edi Rama, ndërsa deklaratat e Bashës i konsideron “leksione boshe”.

“Koha e zgjimit të opozitës me telekomandim ka marrë fund prej kohësh. Opozita është në betejë me regjimin e Edi Ramës dhe beteja është e vetmja formë e përballjes me një regjim. Leksionet boshe mbi opozitën kemi 12 vjet që i dëgjojmë dhe realiteti kur zgjohesh nga ëndrra e gjumit të thellë është që Rama vazhdon të jetë Kryeministër! Shqipëria ka nevojë për ndryshim dhe kjo mund të arrihet vetëm duke qenë më së pari të vërtetë”, përfundon reagimin e tij Gazment Bardhi.