Basania drejt kategorisë së dytë, bushatasit mundin Kinostudion dhe ngjiten në krye të renditjes
Ekipi i Basanias është në rrugën e duhur. Skuadra që përfaqëson zonën e Bushatit po bën një përfaqësim shumë të mirë në Kampionatin Kombëtar të kategorisë së tretë, ku pas fitores në ndeshjen e fundit kundër Kinostudios 7 me 3 është ngjitur në vendin e parë me 16 pikë, aq sa ka edhe skuadra tjetër Prestige. Një ecuri kjo pozitive që i dedikohet punës së mirë që po bën me skuadrën trajneri Fatjon Hasani.
I kënaqur për fitoren ndaj Kinostudios është edhe presidenti i Basanias, Ermir Shimaj, i cili është optimist për kalimin e skuadrës në kategorinë e dytë.
Referuar kronikës së ndeshjes, Basania-Kinostudio, më i spikaturi ka qënë braziliani Pedro Soumah shënues i tre golave, për të vijuar me golashënuesit e tjerë, Albert Mila, Taulant Nikshiqi, Mario Kola dhe Flori Leka, ndërkohë që për miqtë, golat u shënuan nga Saraçi, Bajraktari me penallti dhe Bulku.
