Basha: PD mbështet SPAK për të çuar para drejtësisë të gjithë ata që kanë abuzuar me fondet publike

Kryetari i PD Basha gjatë një vizite në Milotit, ku është takuar me banorët e zonës, ka theksuar mbështetjen  dhe inkurajon SPAK në përpjekjet e tij për te çuar para drejtësisë  të gjithë ata që kanë abuzuar me fondet publike.

Në një postim në rrjetin social Facebook, Basha shkruan se, “Shqipëria ka mundësinë për një ndryshim të vërtetë dhe kjo bëhet duke i dhënë fund pandëshkueshmërisë dhe duke vënë në jetë vetingun e politikanëve ”.

Ai shkruan se,  “korrupsioni është shkaktari i varfërisë dhe emigrimit masiv të shqiptarëve dhe për këtë arsye, ai tha se PD mbështet dhe inkurajon SPAK në përpjekjet e tij për te çuar para drejtësisë  të gjithë ata që kanë abuzuar me fondet publike.

Gjithashtu Kreu i PD, Lulzim Basha, ka folur dhe për projektligjin për vetingun. Sipas Bashës, “dy janë parimet që zbatohen në këtë projektligj: i pari, ndiq paranë. Pra sipas kësaj nisme, paraja e korrupsionit, paraja e politikanit të korruptuar e fshehur në çdo lloj forme dhe mënyre të mundshme, gjurmohet përmes instrumentave që i jepen autoritetit kundër luftës së korrupsionit. Thënë ndryshe, një ILDKP e reformuar dhe e fuqizuar”.