Bashkia inspekton rrugën e Dukagjinit, inxhinierët ndjekin punimet për ndërtimin e mureve mbrojtëse të rrugës
Pas disa sinjalizimeve nga banorë të zonës, një grup pune i inxhinierëve të Bashkisë Shkodër, kanë inspektuar gjatë ditës së sotme punimet që po kryhen nga firma kontraktuese në rrugën e Dukagjinit.
Sinjalizimet e banorëve janë adresuar pranë Bashkisë për punimet në muret mbrojtëse të rrugës. Në një intervistë për mediat, Ridvan Guri, inxhinier pranë Shërbimeve Publike në Bashkinë Shkodër, është shprehur se punimet po ecin me ritme të kënaqshme.
Ndërkohë, sa i takon mureve mbrotjëse, kjo ndërhyrje nuk është ende në fazën përfundimtare siç e parashikon projekti.
Rruga e Dukagjinit, është një investim madhor në infrastrukturë, kërkesë shumë- vjeçare e komunitetit, ndërkohë që në muajin maj pritet të përfundojë edhe loti i parë i ndërtimit të rrugës për të vijuar punën deri në përfundimin e plotë të saj.
