BDI kërkon të mos preket Marrëveshja e Ohrit, mbështet zgjedhjet e parakohshme

Kryetari i Bashkimit Demokratik për Integrim Ali Ahmeti në një intervistë për Radion Evropa e Lirë tha se prekja e përdorimit të gjuhës shqipe në institucionet e Maqedonisë së Veriut do të jetë e rrezikshme.

“Kryeministri Mickoski tha se asgjë nuk ndodh nëse largohen dy-tri dispozita në Ligjin për përdorimin e gjuhëve, por ato janë ‘fuçi baruti’, po i preke. Po u hoq gjuha shqipe nga përdorimi në gjyqësor, prokurori apo në institucionet e larta të shtetit do të thotë se shqipja nuk do të ketë statusin e gjuhës zyrtare. Janë gjëra tepër të rrezikshme. Këtë shqetësim e ndava me nënshkruesit e Marrëveshjes së Ohrit, Bashkimin Evropian dhe SHBA-të.”

Kreu i BDI-së tha se për çështjen e gjuhës dhe përfaqësimit etnik në Maqedoninë e Veriut duhet ta ngrenë zërin të gjithë.

“Të gjithë shqiptarët e Maqedonisë së Veriut duhet ta ngrenë zërin që gjuha shqipe të mos rrezikohet dhe përfaqësimi etnik të mos cenohet. Kjo nuk është çështje partiake, u takon të gjithë shqiptarëve të Maqedonisë së Veriut, por edhe shqiptarëve të Shqipërisë. Institucionet në Shqipëri i detyron Kushtetuta që të ngrenë zërin kundër padrejtësive që mund t’u shkaktohen bashkëkombësve të tyre në Maqedoninë e Veriut, Serbi apo Mal të Zi.”

Duke iu përgjigjur deklaratës se kryeministrit maqedonas për zgjedhje të parakohshme, Ahmeti tha se kreu i qeverisë duhet ta mbajë fjalën.

“T’i qëndrojë fjalës së dhënë. Ne si BDI, si Front Evropian e përshëndesim këtë deklaratë dhe presim që zgjedhjet e ardhshme lokale, që janë në tetor të vitit të ardhshëm, të jenë bashkë me ato të parakohshme parlamentare.”

Duke mbyllur intervistën, kreu i BDI theksoi se Evropa do të jetë më e fortë duke integruar Ballkanin Perëndimor në hapësirën e saj.

Në qoftë se shteti do progres, ky moment duhet të ndodhë. Pra, të bëhen ndryshimet kushtetuese. Këtë e kërkon edhe rajoni, por edhe Evropa e Uashingtoni. Na duhet një Ballkan Perëndimor i qetë, pa probleme, tërësisht i pajtuar me fqinjët. /REL