BE kritikon Serbinë, terroristët nuk mund të barazohen kurrë me viktimat e terrorizmit

Zëdhënësi i Bashkimit Evropian, Peter Stano, kritikoi Serbinë për shpalljen e ditës së zisë në nder të serbëve të vrarë që sulmuan policinë e Kosovës dhe vranë rreshterin Afrim Bunjaku. Stano tha se “nuk mund të barazohen viktimat e terrorizmit me terroristët”.

“Kemi parë se Serbia dje ka shpallur ditë zie. Të hënën zyra e BE-së në Prishtinë vendosi flamurin në gjysmështizë për të nderuar policin e vrarë dhe policët e plagosur, viktima të sulmit qyqar terrorist të dielën. Qëndrimi ynë është i qartë dhe ai është shprehur nga përfaqësuesi i lartë Josep Borrell më 24 shtator. Për më tepër, sulmuesit kurrë nuk mund të barazohen me viktimat.. Në përgjithësi, BE-ja është fundamentalist kundër madhërimit të kriminelëve dhe terroristëve dhe kundër mbajtjes së zisë për ta”, tha Stano.

Duke u përgjigjur në pyetjet për deklaratën e presidenti serb Aleksandar Vuçiç, se nuk mund t’i konsiderojë “kurrë terroristë” sulmuesit në Banjskë, Stano tha se sipas BE-së, sulmi ndaj Policisë së Kosovës ishte sulm terrorist dhe si i tillë duhet të trajtohet dhe hetohet.

“Para së gjithash më lejoni të përsëris shumë qartë qëndrimin e Bashkimit Evropian për atë që ndodhi të dielën. Ai ishte një sulm terrorist dhe si sulm terrorist duhet të hetohet. Dhe ata që janë përgjegjës duhet të sillen para drejtësisë. Secili që ka rol duhet të bashkëpunojë në mënyrë që ky sulm terrorist jo vetëm të hetohet në tërësi, por të ketë përgjigje para drejtësisë për ata që e planifikuan, kryen dhe që qëndrojnë prapa këtij sulmi”, tha Stano.

Zëdhënësi i BE shtoi se unioni “nuk do komentojë çdo deklaratë apo secilin interpretim”, pasi duhet të ketë qartësi për atë që ndodhi të dielën”. BE ka thënë se po pret përfundimin e hetimeve për të vendosur nëse do të ndërmarrë masa, teksa në bllok disa shtete kanë kërkuar që Serbia të ndëshkohet për rastin në Banjskë të Zveçanit.