BE mbështet planin e SHBA për paqe të qëndrueshme në Gaza

BE mbështet planin e SHBA për një armëpushim të qëndrueshëm në Gaza. Diplomati i politikës së Jashtme të BE, Xhosef Borrell (Josep) tha se Bashkimi Evropian jep mbështetjen e tij të plotë për udhërrëfyesin gjithëpërfshirës të paraqitur nga Presidenti Biden, që do të çonte në një armëpushim të qëndrueshëm në Gaza, lirimin e të gjithë pengjeve dhe një rritje të ndihmës humanitare për Gazën.

“BE vlerëson përpjekjet e vendosura të SHBA-së, Egjiptit dhe Katarit në lehtësimin e negociatave për t’i dhënë fund luftës midis Izraelit dhe Hamasit, duke garantuar njëkohësisht sigurinë e Izraelit, për të cilën BE-ja mbetet plotësisht e përkushtuar. Janë humbur shumë jetë civilësh. Nevojitet urgjentisht një armëpushim i qëndrueshëm, për të siguruar mbrojtjen e civilëve, lirimin e pakushtëzuar dhe të menjëhershëm të të gjithë pengjeve, siguria dhe mirëqenia e të cilëve është shqetësuese, dhe për të rritur rrjedhën e ndihmave humanitare shumë të nevojshme në Gaza në funksion të krizës humanitare në thellim. . Paqja dhe stabiliteti në Lindjen e Mesme janë në interes të të dy popujve, të rajonit në tërësi, si dhe globalisht” u shpreh Borrell.

Diplomati evropian tha se BE kërkon nga Izraeli dhe Hamasi të pranojnë propozimin që do të shtrihet në 3 faza dhe do të “kontribuojë në ringjalljen e një procesi politik për një paqe të qëndrueshme bazuar në zgjidhjen e dy shteteve dhe të mbështesë një përpjekje të koordinuar ndërkombëtare për rindërtimin e Gazës”.

Deri tani Hamasi dhe Izraeli kanë dhënë sinjale pozitive për pranimin e planit të propozuar nga SHBA, por ende nuk kanë thënë fjalën përfundimtare. Më shumë se 36,000 palestinezë kanë mbetur të vrarë nga sulmet izraelite në 8 muaj luftime, ndërsa ofensiva e Izraelit në Gaza ka ndërprerë futjen e ushqimeve dhe ilaçeve tek palestinezët, të cilët po përballen me uri të tejskajshme.