Begaj takohet me drejtuesit e Autoritetit të Dosjeve: Krijimi i kulturës së pendesës, vonesë e pajustifikueshme
Presidenti Bajram Begaj është takuar sot me drejtuesit e Autoritetit për Informimin mbi Dokumentet e ish-Sigurimit të Shtetit.
Begaj vlerësoi angazhimin e këtij institucioni për çështjet e përballjes me të shkuarën, ndërsa i garantoi mbështetje Autoritetit në përmbushjen e funksioneve që i ngarkon ligji.
“Duke nderuar historinë, ne i thërrasim ndërgjegjes sonë që të mësojmë nga gabimet e së shkuarës. Duhet të ndërtojmë një model të së drejtës në shoqëri, që nis nga rivlerësimi i të gjitha mohimeve të dhunshme që u janë bërë ish-të persekutuarve në Shqipëri.
Krijimi i kulturës së pendesës dhe ndjesës së vërtetë nga autorët e këtij persekutimi është, gjithashtu, një vonesë e pajustifikueshme. Hipokrizia edhe mungesa e konsekuencës në vendosjen e këtij modeli këto 34 vjet, duhet të marrin fund”, – u shpreh kreu i shtetit.
Gjatë bashkëbisedimit, Begaj theksoi rëndësinë e ndërgjegjësimit dhe edukimit të të rinjve shqiptarë që nuk e kanë jetuar atë regjim.
“Brezi i ri duhet të mësojë për të kaluarën, që historia të mos përsëritet”, – u shpreh ai.
Ndërsa kemi hyrë në vitin elektoral, presidenti kërkoi nga Autoriteti i Dosjeve të bëjnë përpjekje për verifikimin në kohë të pastërtisë së figurave që do të kandidojnë në zgjedhjet parlamentare, në mënyrë që zgjedhësit të përfaqësohen denjësisht nga figura që nuk kanë lidhje me të shkuarën.
