Berisha: Dumani është një majtist i pakorrigjueshëm! Vetë Skapi është i kapur nga McGonigal, bashkë vunë gjobat!

Vetëm pak orë pasi kreu i SPAK Dumani hodhi më shumë dritë rreth “Çështjes McGonigal”, kryetari i grupimit të Rithemelimit në PD Sali Berisha, reagoi në një konferencë shtypi. 

Ai akuzoi SPAK-un dhe drejtuesit e tij se “…është një institucion politik, zhvatës, gjobëvënës, një instrument që përdoret për ambiciet politike të Edi Ramës”. “Ky Dumani është një majtist i pakorrigjueshëm, pra ky nuk mund të pranojë që qeveria e partisë së tij të shpallet organizatë kriminale” tha zoti Berisha.

Ai shtoi më tej se SPAK është kapur nga agjenti i lartë i FBI McGonigal, i cili është akuzuar për tradhëti të lartë ndaj SHBA si i rekrutuar nga shërbimet ruse. 

Por sipas zotit Berisha  “ McGonigal, aspektin më të zi nuk e ka se është marrë me dosjen e Sali Berishës. Jo! Është ideologjikisht i motivuar kundër parimeve të Berishës dhe e lufton!” tha ai. 

Ish kryeministri Berisha e akuzoi  McGonigal se me Edi Ramën, Dorian Duçkën, Agron Nezën dhe të tjerë ka vendosur gjoba deri në 5 milionë euro. 

Lidhur me dosjen e dorëzuar nga Gazment Bardhi në SPAK para dy muajsh, zoti Berisha tha se “ është e vërtetë se ajo dosje do ketë fatin e të gjitha të tjerave”.