Berisha: Kur të plotësohet administrata Trump, nis lobimin për heqjen e non-gratës!

Kreu i Partisë Demokratike, Sali Berisha, shprehu besimin se ardhja e Donald Trump në Shtëpinë e Bardhë mund të hapë mundësinë për heqjen e “non gratës” që SHBA i ka vendosur atij në 2021.

Ai theksoi se nuk ka filluar ende lobimin, pasi administrata e re është ende në proces konfirmimesh, dhe nuk e sheh këtë çështje si një prioritet të menjëhershëm. Berisha e cilësoi vendimin si një akt politik të Xhorxh Sorosit, duke theksuar se ai u mor pa dokumente ligjore, vetëm përmes lobimit të tij.

“Jo, unë nuk e kam filluar lobimin sepse janë gjithsej 14 ditë që ka filluar administrata e re. Dhe unë nuk besoj që në ditët më të para të saj, të jetë përparësi ky problem. Kështu që unë jam i vetëdijshëm se duhet të plotësohet administrata, d.m.th është një proces konfirmimesh që duhet të kalojë në Kongres. Dhe procesi i konfirmimeve të zyrtarëve nuk është vetëm për sekretarët e shtetit, por edhe për persona nën rangun e tyre. Unë pres që të plotësohet administrata e re dhe pa asnjë diskutim do i drejtohem administratës së re. I vetmi shkak që nuk i jam drejtuar është kjo.

Dhe jam besimplotë sepse është kuptuar universalisht që ai ishte një akt politik i Xhorxh Sorosit dhe se Sekretari i Shtetit e ka bërë atë pa respektuar asnjë ligj të vendit të vet, pa asnjë dokument në dosje, thjesht me lobimin korruptiv të Xhorxh Sorosit”, tha Berisha

Ish-kryeministri Sali Berisha u shpall “non grata” nga Departamenti Amerikan i Shtetit, ku akuzohet i përfshirë në veprime korruptive, duke përdorur pushtetin për përfitimet e tij dhe për të pasuruar aleatët e tij politikë si dhe cenim të demokracisë.

Gjatë konferencës, Berisha theksoi edhe rëndësinë e luftës kundër trafikut të njerëzve dhe emigracionit, duke e konsideruar këtë si një çështje kryesore në agjendën e PD-së kur ajo të vijë në pushtet. Sipas tij, me Partinë Demokratike, Shqipëria do të ndalojë fluksin e emigrantëve që përdorin territorin e saj si kalim për të arritur në vendet perëndimore.

“Sot në axhendën e të gjitha qeverive më serioze, përfshi presidentin e SHBA, Trump, është problemi i trafikut njerëzor, i emigracionit, i refugjatëve. Partnerët, aleatët tanë e kanë shumë të qartë se me PD-në në pushtet, zero flukse trafikimi drejt vendeve të tjera. Nuk do ketë më emigrantë që të përdorin territorin e Shqipërisë për të ecur drejt Perëndimit. Ligji, ata e dinë që është forcë e ligjit, shteti ligjor, PD. Me një vokacion të palëkundur për tregun e lirë, por dhe trajtimin e çështjeve sociale me përgjegjësi të madhe.

Mund t’u them se ishte udhëtim drejt fitores pasi e kuptoni vetë, pjesëmarrja pas kaq vitesh në një kongres, unë mund t’ju them se përzemërsia ndaj nesh, ndaj përfaqësuesve të PD-së, ishte më e madhe se asnjëherë. Nuk kam gjetur ndonjëherë një përzemërsi të tillë në ndonjë konventë ndërkombëtare”, tha Berisha.