Berisha: Protestat do përshkallëzohen, okupojmë institucionet

Kryetari i Partisë Demokratike Sali Berisha në një deklaratë për media paralajmëroi përshkallëzim të protestave të opozitës. Berisha u shpreh se protestat e opozitës nuk do të ndalen, por do të shtrihen në impakt, kohë e revoltë.

Duke sjellë në vëmendje procedimin penal nga policia të disa deputetëve opozitarë për protestën e zhvilluar ditën e djeshme, Berisha u shpreh se Kryeministri Edi Rama është i frikësuar dhe se ka vetëm një mundësi, ndërprerjen e dhunës ndaj demokratëve pasi në të kundërt do mbajë përgjegjësi personale.

“Kombi është në një pushtim të egër. Pushtim që e ka renditur Shqipërinë 10 shkallë më poshtë se Vietnami.

Pushtim që krerët e opozitës I rrëmben në mes të rrugës, i zvarrit dhe burgos nga frika dhe tmerri i narko diktatorit prej tyre.

Tre orët e djeshme ku narkoshteti u paralizua, ishin 3 orët e çlirimit për Shqipërinë e shqiptarët. beteja nuk do ndalet. Narko policia ndërhyri dje ndaj protestuesve paqësor, narko policia kishte urdhër të qartë për të ndërprerë protestën, por dështuan.

Rikujtoj se keni ezauruar vetëm 2 nga 77 mënyrat e mosbindjes civile. Kemi 75 mënyra të tjera dhe do përshkallëzohen në impakt dhe kohë, në destinacione, revolt e zemërim.

Edi Rama e di mirë se dje ishin vetëm 3 orë, por herën tjetër do jenë 3 ditë e 3 javë po qe nevoja dhe jo bllokim rrugësh, por okupim të institucioneve pa të cilat narko shteti nuk do mund të funksionojë. Rama ka vetëm një mundësi: ndërpresë dhunën dhe terrorin ndaj demokratëve se për çdo akt që po ndërmerr do bëhet përgjegjës personal ai vetë; të krijojë qeverinë teknike”, u shpreh Berisha.