Berisha sulmon Kongresin e PS dhe Ramën: E vërteta është se proces integrimi me Edi Ramën, nuk ka!

Ish kryeministri Sali Berisha i cili aktualisht drejton grupimin e Rithemelimit në PD, sulmoi ashpër kongresin e jashtëzakonshëm të PS, duke e konsideruar  një parapërgatitje për shqiptarët për një “jo” nga BE për anëtarësimin e vendit në Bashkimin Europian.

“Me këtë fjalim ai po përgatit izolimin e plotë të Shqipërisë” tha zoti Berisha pak pasi kryeministri socialist Edi Rama mbajti fjalimin e tij. “
E vërteta është se proces integrimi me Edi Ramën, nuk ka. E gjithë ajo që dëgjuan shqiptarët ishte një parapërgatitje për një JO për hapjen e negociatave, pikërisht për shkak të vendosjes së një diktature të re, diktaturë të bazuar në bandën, krimin dhe drogën” tha zoti Berisha.

Sipas tij “Rinia që priste sot nga ky kongres i partisë së krimit të dëgjonte një fjalë, konstatojë se ata nuk ekzistonin. Mbajti fjalim sikur kishte kaluar tërë natën nën efektin e drogave të forta. U ndal gjerësisht në integrimin, proces të cilin ai me lidhjet e tij të tmerrshme me krimin, me Sinaloan e Meksikës, me Bajrët e Shkodrës, me bandat e Durrësit dhe të Elbasanit, me Olsin e tij dhe Xibrakën, proces të cilin me vjedhjet tashmë famoze që jehojnë në të katër anët e Brukselit, djegësit, vetëm njëri prej tyre 1 miliard euro, proces të cilin me Dubai Cityn e tij, me të cilin do të krijojë lavatriçen më të madhe në Europë të parave të drogës dhe vjedhjeve që ka bërë ortaku i vëllait të tij me Bitcoin. Këto nuk ekzistojnë për Europën dhe integrimin” tha zoti Berisha. 

Sipas tij “Ne rrezikojmë me datën 12 dhjetor të marrim një karton të kuq. Dhe pse? Vetëm e vetëm për shkak të qëndrimeve mafioze të Edi Ramës, i cili interesat e pasurimit të tij, interesat e pasurimit të klaneve të tij, i vendos mbi interesat e të gjithë shqiptarëve” tha Berisha.