Berisha vazhdon të protestojë nga arresti shtëpiak: Faji i Sali Berishës është se ndërhyri për të shpëtuar opozitën e Shqipërisë kur ajo u kap peng nga Edi Rama!

Kreu i fraksionit të Rithemelimit në PD të opozitës, Sali Berisha, vazhdon të akuzojë kryeministrin socialist Edi Rama për problemet e tij me drejtësinë.

Zoti Berisha i cili është akuzuar për korrupsion pasiv dhe përfitim, gjendet në arrest shtëpiak në banesën e tij  në Rrugën e Elbasanit, dhe vazhdon të mbajë kontakte në distancë me përkrahësit e tij që për orë të tëra qendrojnë para banesës.

Sipas tij prania e tyre “është era e ndryshimit, e cila buron nga shpirti, zemra, idealet tuaja dhe ka të gjithë fuqinë për të ndryshuar fatet e shqiptarëve dhe Shqipërisë”.

Për ish presidentin e pare të Shqipërisë pluraliste dhe ish kryeministrin e Shqipërisë në vitet 2005-2013, “Kurrë ndonjëherë në historinë e perëndimit nuk është bërë një luftë kaq e egër kundër një partie si ajo që na është bërë ne si PD”.

Për zotin Berisha “Në vitet e përpjekjeve të përbashkëta, PD bëri më shumë se të gjithë paraardhësit e saj në 110 vite pavarësi të marrë së bashku”.

Por sipas tij “….këtë 10-vjeçar, demokratët janë persekutuar, janë trajtuar si qytetarë të dorës së dytë dhe të tretë, janë diskriminuar, janë mohuar, janë luftuar egërsisht si armiq nga Edi Rama, narkoregjimi i tij, mafia ndërkombëtare me në krye monstrën e njerëzimit, Xhorxh Sorosin”.

Por sipas zotit Berisha „Përgjigjen e vërtetë e di çdo shqiptar. Faji i Sali Berishës është se ndërhyri për të shpëtuar opozitën e Shqipërisë kur ajo u kap peng nga Edi Rama“.

“Faji i Saliut ishte se denoncoi çdo ditë aferat e shekullit, inceneratorët, sterilizatorët, vjedhjet në Portin e Durrësit, lidhjet e tmerrshme të Edi Ramës dhe qeveritarët me bandat, me trafikantët e drogës” thekson zoti Berisha.

Deklaratat e kreut të fraksionit të Rithemelimit në PD janë komentuar nga ministri  brendshëm Taulant Balla. Ai e konsideroi sjelljen të “papranueshme”, por theksoi se i takon institucioneve të reagojnë.

Sipas vendimit të GJKKO-së, Berishës i ndalohet komunikimi me persona të tjerë përveç atyre që bashkëjetojnë në të njëjtën banesë me të.