Biçikleta, simbol i Shkodrës, kohët kanë ndryshuar, por shkodranët i mbeten besnikë lëvizjes me biçikletë
Biçikleta është terapi, jo thjesht një mjet lëvizës transporti. Këtë më mirë se askush tjetër e kuptojnë shkodranët që duken aq të dashuruar pas saj. Në qytetin ku ka lindur biçikleta nuk është fare e vështirë të gjesh njerëz që e përdorin atë për itinerare të ndryshme dhe Antonjeta ka 53 vite që lëviz me biçikletë.
Në biçikletën e saj udhëton edhe katërputroshi i vogël që Antonjeta e shëtit çdo ditë me biçikletë.
Ishte viti 1907, më shumë se një shekull, kur në Shkodër u pa të lëvizte një i huaj. Ai përdorte një mjet që askush nuk e kishte parë më parë. Ky burrë ishte konsulli i nderit i Suedisë, ndaj edhe kureshtja për ta parë ishte mjaft e madhe. Dëshmitë e kohës rrëfejnë se kush e dëgjoi , u dynd andej nga rruga kryesore ku ai lëvizte vazhdimisht. Kështu biçikleta fitoi qytetarinë e saj në Shkodrën që aq shumë e do.
