Braktisi ceremoninë kryesore të D-Day, Rishi Sunak kërkon falje: Ishte vendim i gabuar
Kryeministri i Britanisë Rishi Sunak ka kërkuar falje që braktisi ceremoninë përkujtimore të 80-vjetorit të D-Day (zbarkimit të aleatëve në Normandi) për të zhvilluar një intervistë televizive, një vendim që ka nxitur mosbesimin duke cenuar fushatën elektorale për zgjedhjet e përgjithshme.
Sunak ishte i pranishëm vetëm në pjesën e parë të ngjarjeve përkujtimore të zbarkimit në Normandi të Francës, por braktisi ceremoninë ndërkombëtare në Omaha Beach, e cila u ndoq nga udhëheqës të tjerë botërorë dhe veteranë të operacionit të aleatëve në 1944 ndaj Gjermanisë naziste.
“Gjëja e fundit që dua është që përkujtimet të mbeten në hije nga politika” shkroi Sunak teksa kërkoi falje.
“Pas përfundimit të ceremonisë në Normandi, u ktheva përsëri në Britaninë e Madhe. Reflektova dhe në fakt ishte vendim i gabuar të mos qëndroja më gjatë në Francë, kërkoj falje”, shkroi Sunak më tej në ‘X’.
Vendimi i tij për të braktisur ceremoninë kryesore ka shkaktuar mosbesim në Britani dhe është konsideruar si një tjetër llogaritje e gabuar në fushatën zgjedhore të Sunakut.
Sunak u largua nga ngjarja për të zhvilluar një intervistë për fushatën elektorale me transmetuesin ITV, në të cilën ai mbrojti pretendimet në lidhje me planet tatimore të Partisë Laburiste të opozitës.
Më shumë se 20 krerë shtetesh, qeverish dhe përfaqësues nga familjet mbretërore anembanë Evropës, morën pjesë në ceremoninë ndërkombëtare, e cila u zhvillua në ditën përkujtimore 80 vjet nga zbarkimi i aleatëve në Francën e pushtuar nga nazistët, ku nisi humbja e Gjermanisë në Luftën e Dytë Botërore.
Mbretëria e Bashkuar u përfaqësua nga David Cameron, sekretari i jashtëm i Sunak dhe një ish-kryeministër, i cili bëri fotografi së bashku me presidentin francez Emmanuel Macron, kancelarin gjerman Olaf Scholz dhe presidentin e SHBA Joe Biden.
I pranishëm ishte edhe lideri laburist Keir Starmer, i cili u filmua duke folur me presidentin ukrainas Volodymyr Zelensky gjatë ngjarjes. Laburistët nxituan të dënojnë vendimin e Sunak për të anashkaluar ngjarjet dhe gafa dominoi mbulimin e lajmeve britanike të zgjedhjeve të premten.
“Përkujtimet e djeshme të Ditës D kishin të bënin me kujtimin e trimërisë së të gjithë atyre që i shërbejnë vendit tonë. Në zgjedhjen për t’i dhënë përparësi paraqitjeve të tij televizive të kota mbi veteranët tanë, Rishi Sunak ka treguar se çfarë është më e rëndësishme për të”, është shprehur Jonathan Ashëorth, Drejtor i Përgjithshëm i Partisë Laburiste.
Aktualisht Sunak parashikohet të humbasë zgjedhjet e 4 korrikut ndaj laburistëve me një diferencë të madhe dhe fushata e tij nuk ka arritur momentin vendimtar që mund të lëkundë sondazhet në favor të tij.
