“Brothers”, çon në pranga tre vëllezërit, akuzohen se plagosën 54- vjeçarin një vit më parë
Në zbatim të masave të megaoperacionit “Sundimi i ligjit”, u finalizua operacioni policor i koduar “Brothers”. Si rezultat i kontrolleve të ushtruara në zbatim të masave të hartuara në kuadër të megaoperacionit “Sundimi i ligjit”, për kapjen e shtetasve në kërkim, bazuar dhe në informacionet e siguruara nga inteligjenca policore, Sektori për Hetimin e Krimeve të Rënda i DVP Lezhë, në bashkëpunim me Komisariatin e Policisë Mirditë dhe me Forcat e Sigurisë Kombëtare, finalizoi operacionin e koduar “Brothers”. Si rezultat i këtij operacioni u ndaluan shtetasit në kërkim: Edmond Marku 36 vjeç, Mark Marku 33 vjeç dhe Loni Marku 29 vjeç akuzohen për veprën penale “Plagosja e rëndë me dashje”, kryer në bashkëpunim”. Gjykata e Shkallës së Parë e Juridiksionit të Përgjithshëm Lezhë i ka caktuar këtyre shtetasve masën e sigurisë “Arrest në burg”, për veprën penale “Plagosja e rëndë me dashje”, kryer në bashkëpunim”, pasi dyshohet se më datë 12.05.2023, në Fan, Mirditë, kanë goditur me sende të forta shtetasin B. N., për motive të dobëta.
