Bullgaria: Zhvillimi i Korridorit Jug–Veri do të sillte stabilitet në Europën Juglindore

Europa Juglindore dhe vendet e Ballkanit Perëndimor, mes tyre Shqipëria, duhet të punojnë për një ndërlidhje më të fortë infrastrukturore, energjetike dhe të investojnë në novacion.

Ky është vizioni i Greqisë, Rumanisë, Kroacisë dhe Bullgarisë, i shprehur të martën me një deklaratë të përbashkët të miratuar në vazhdën e takimeve të nivelit të lartë në Asamblenë e Përgjithshme të OKB-së. 

“Ne jemi të përkushtuar për të forcuar ndërlidhjet tona në shkencë, arsim, energji, teknologji dhe novacion, për të siguruar një zhvillim më të qëndrueshëm të rajonit të Europës Juglindore,” thuhet në deklaratën e përbashkët të miratuar nga të katra shtetet e rajonit.

Zv.kryeministrja dhe shefja e diplomacisë bullgare , Marija Gabriel (o. Mariya) tha se duhet punuar për stabilitetin.

“Prandaj objektivi ynë është të tërheqim vëmendjen te zhvillimi i korridorit Jug–Veri. Kjo do të thotë infrastrukturë, siguri energjetike dhe diversifikim. Do të thotë të investime në konektivitet, në novacion,” shtoi kryediplomatja.

Edhe pse është anëtare e Bashkimit Evropian, Bullgaria po lufton diplomatikisht për t’iu bashkuar zonës Shengen si shumë vende të rajonit.

Austria mbetet një nga vendet e BE-së që e refuzon futjen e Rumanisë dhe të Bullgarisë në zonën Shengen. Arsyeja e bllokimit është fluksi i lartë e emigrantëve të paligjshëm nga këto dy vende.

Këtë çështje, presidenti bullgar Rumen Radev e diskutoi të martën edhe me homologun austriak Aleksandër Van der Bellen (o. Alexander Van).

“Agjencitë ligjzbatuese bullgare po kapin trafikues të emigrantëve nga të gjitha shtetet anëtare të BE-së, të cilët vijnë për të bërë biznes në Bullgari. Por qendrat operative të trafikimit ilegal nuk janë në Bullgari, po në Gjermani, Austri dhe Holandë. Po s’i goditëm këto qendra, emigracioni ilegal përmes Bullgarisë do të vazhdojë,” tha presidenti Radev, duke folur nga ambientet e OKB-së në Nju-Jork.