Bursa për të rinjtë e Veriut, “North in Focus” i mbështetur nga qeveria britanike

Panairi i Edukimit, një projekt mbështetës për të rinjtë gjimnazistë të veriut të Shqipërisë, po kthehet në një traditë.

Për të dytin vit radhazi ky panair i Dhomës Britanike të Tregtisë u organizua me gjimnazistët e Dibrës dhe të Kukësit.

Ky aktivitet solli bashkë disa prej universiteteve private prestigjioze të vendit, të cilat ofruan bursa studimi 100 për qind për maturantët e Dibrës, Kukësit, Tropojës e Hasit.

Për profesorin Altin Sholla, këto nisma synojnë të tërheqin talente të fushave të ndryshme e kapacitete që më pas do të përkthehen në aftësime të mëtejshme drejt tregut të brendshëm e global.

“I drejtojmë ata kundrejt zgjedhjes së programeve, që do i ndihmojnë nesër me dijet e marra gjatë periudhës së universitetit, ata të kthehen në vendlindjen e tyre dhe të zhvillohen më tej,” deklaron pedagogu.

Ndërsa drejtori ekzekutiv i Dhomës Britanike të Tregtisë, Aldi Molloholli, tha se ky projekt ka dhënë frytet e veta.

“Nëpërmjet panairit ‘Investo në veri’ arritëm të ofronim rreth 40 bursa studimi në universitetet prestigjioze në Tiranë, gjë të cilën e dëshirojmë të ndodhë edhe këtë vit,” thotë z. Molloholli.

Vitin e kaluar nga 200 maturantë aplikues përfituan 37 me bursa studimi në mjekësi, shkenca kompjuterike, marrëdhënie ndërkombëtare, ekonomi etj. me një vlerë totale mbi 400 mijë euro për tri vitet e studimit, bazuar në kriteret e përcaktuara sipas universiteteve.

Dhoma Britanike e Tregtisë është themeluar në vitin 2023 përgjatë vizitës së ish-Sekretarit të Jashtëm, James Cleverly, dhe e njohur zyrtarisht nga organizata globale British Chambers of Commerce. Ajo financohet nga qeveria britanike përmes ambasadës së saj në Tiranë.