Ceremonia e ngritjes së flamurit / Shiu nuk pengoi festimet për 111-vjetorin e Pavarësisë së vendit në Shkodër

Ndonëse një ditë me shi, Shkodra e ngriti në mënyrë simbolike flamurin kombëtar në sheshin para Bashkisë. Në ceremoninë zyrtare, zhvilluar në kuadër të 111-vjetorit të pavarësisë së vendit morën pjesë përfaqësues zyrtarë, klerikë dhe qytetarë.

Kryetari i Bashkisë, Benet Beci, u shpreh mbi rëndësinë e kësaj dite kuptimplotë për të gjithë kombin.

Pak metra më tutje, u vendosën kurora para shtatores së Luigj Gurakuqit, njërit prej firmëtarëve të pavarësisë së vendit, por edhe në vende të tjera ku prehen dëshmorët e atdheut.

28 Nëntori përfaqëson ditën më të rëndësishme të shtetformimit shqiptar. Një natë më herët në fasadën e Bashkisë së Shkodrës u projektuan disa nga imazhet e rralla të figurave patriotike dhe ngjarjeve që shënjuan këtë moment historik për të gjithë kombin.