Çfarë është grupi Houthi dhe pse po sulmojnë anijet në Detin e Kuq?

Lëvizja Houthi, e njohur gjithashtu si Ansarallah (Përkrahësit e Zotit), u shfaq në vitet 1990, kur udhëheqësi i saj, Hussein al-Houthi, nisi një lëvizje ringjalljeje fetare si një nënsekt shekullor të Islamit Shiit të quajtur Zaidizëm. Zaidët sunduan Jemenin për shekuj, por u margjinalizuan nën regjimin sunit që erdhi në pushtet pas luftës civile të vitit 1962.

Lëvizja e Al-Houthit u themelua për të përfaqësuar Zaidët dhe për t’i rezistuar sunnizmit radikal, veçanërisht ideve vehabiste nga Arabia Saudite. Ndjekësit e tij më të afërt u bënë të njohur si Houthis.

Aktualisht, Houthi-t mbeten nën kontrollin e pjesës më të madhe të Jemenit dhe janë pjesë e të ashtuquajturit “Boshti i Rezistencës” së Iranit – një aleancë anti-izraelite dhe antiperëndimore e milicive rajonale të mbështetur nga Republika Islamike.

Së bashku me Hamasin në Gaza dhe Hezbollahun në Liban, Houthis janë një nga tre milicitë e shquara të mbështetura nga Irani që kanë nisur sulme ndaj Izraelit gjatë javëve të fundit.

Sulmet në Detin e Kuq

Houthi-t kanë shënjestruar anijet tregtare në Detin e Kuq për t’i shkaktuar dëme ekonomike Izraelit dhe aleatëve të tij si përgjigje ndaj skenave të tmerrshme që vijnë nga Gaza, dhe besohet të jetë një përpjekje për të bërë presion mbi Izraelin që të pushojë bombardimi.

Ekonomisë globale i janë rikthyer një sërë kujtimesh të dhimbshme për rëndësinë e kësaj pjese të detit, e cila shkon nga ngushtica e Bab-el-Mandeb në brigjet e Jemenit deri në Kanalin e Suezit në Egjiptin verior – dhe përmes së cilës kalon 12% e fluksit të tregtisë globale, duke përfshirë 30% të trafikut global të kontejnerëve.

Një numër vendesh kanë ndërmarrë hapa për të frenuar agresionin Houthit në rajonin e Detit të Kuq. Këshilli i Sigurimit i Kombeve të Bashkuara ka miratuar ndërkohë një rezolutë që i bën thirrje grupit rebel Houthi të Jemenit të ndalojë sulmet e tij në Detin e Kuq, transmeton CNN. 

Nga ana tjetër, një zëdhënës i Houthit tha se ata do të vazhdojnë sulmet e tyre “për të parandaluar anijet izraelite që shkojnë në portet e Palestinës së pushtuar nga lundrimi në Detet Arabe dhe atij të Kuq”.